Mae arddangosfa unigol ddiweddaraf Charlotte Grayland, Græg, yn archwilio atgofion teuluol drwy grefftau a deunyddiau wedi’u pasio lawr o un genhedlaeth i’r llall. Gan ganolbwyntio ar eiconograffi a ailadroddir, nodweddion esthetig a etifeddwyd, a deialog rhwng cenedlaethau, mae’r sioe yn bodoli i gwestiynu a chydnabod yr elfennau gwrywaidd a benywaidd sy’n bresennol yn yr hunan.

Wrth gyflwyno cyfres o gerfluniau geometrig haniaethol, mae Grayland yn chwarae gyda phriodweddau elfennol ei chyfryngau er mwyn portreadu nodweddion sgerbydol treftadaeth anweledig. Gellir datgymalu, plygu, gwahanu ac ailadeiladu gweithiau, gan efelychu’r prosesau gaiff eu hailadrodd wrth adalw atgof.

Mae’r sioe’n ystyried y berthynas a’r gwrthdaro rhwng delweddaeth a deunyddiau gwrywaidd a benywaidd traddodiadol, gan drawsnewid elfennau gweledol sy’n fwy cysylltiedig â gwrywdod yn wrthrychau a chanlyniadau sydd â chynodiadau mwy benywaidd.

Yn ganolog i’r sioe fe welir tri portread wedi’u cwiltio, sydd wedi’u llunio mewn cydweithrediad â Mam yr artist. Mae Græg hefyd felly yn tynnu sylw at grefftau traddodiadol Cymreig benywaidd

(neu ‘waith menywod’), fel modd o gysylltu â llafur teuluol y cenedlaethau ddaeth o’i blaen, wrth gysylltu gofod yr oriel gyda’r domestig; y cartref.

Cafodd yr holl waith a arddangosir ei greu a’i ddatblygu yn ystod cyfnod Grayland ar Breswylfa Stafell Sgwennu Bay Art.